Está a extinguirse a herpetofauna debido ao cambio climático?

Os lagartos, as rás, as píntegas e as serpes non poden xerar o seu propio calor: a súa temperatura corporal depende do medio ambiente. Por iso, o clima determina cando poden comer, moverse ou reproducirse, así como onde poden vivir. Nesta charla, veremos como funciona este equilibrio térmico e que sucede cando o planeta se quenta máis rápido do que estes animais poden adaptarse. Usando exemplos da Península Ibérica e doutras rexións do mundo, revisaremos que poboacións xa están a desaparecer, cales están máis en risco e que podemos facer para prepararnos para o futuro.

Agustín Camacho é andaluz e leva máis de 15 anos estudando como a temperatura limita a vida e a distribución dos anfibios e réptiles. É licenciado pola Universidade de Córdoba. Fixo un mestrado en Ecoloxía e Biovixilancia na Universidade Federal da Bahía e obtivo o doutoramento na Universidade de São Paulo, onde tamén traballou como investigador posdoutoral. Durante este período, colaborou con equipos de Australia (Adelaide) e dos Estados Unidos (Arizona State University). En 2020, recibiu unha bolsa Marie Skłodowska-Curie da Comisión Europea para realizar investigación na Estación Biolóxica de Doñana (CSIC). Publicou máis de 50 artigos científicos e é profesor de Fisioloxía Animal na Universidade Autónoma de Madrid. Creou VULNERAWEB, unha plataforma aberta que cartografía a vulnerabilidade climática da fauna por todo o mundo.