Actividade na comarca Deza-Tabeirós

Excelente xornada o pasado sábado 11/05/2019 na que xiramos visita pola zona do Deza-Tabeirós guiados polo noso consocio Víctor Perez (preme aquí para descargar a reseña ampliada). Comezamos a primeira hora da mañá na Fraga de Catasós, estaba preciosa e con algo de humidade comezando a entrar o sol por entre as polas das árbores.

Seguimos ata Lalín ao Museo Ramón María Aller, unha sorpresa magnífica e unhas explicacións de alto nivel por Dª Cecilia Doporto, a poucos metros paramos un intre na estatua ao aviador lalinense Joaquín Loriga.

De ahí cara á localidade de Ventosa. Tras recoller as chaves no bar O Manco, achegámonos á Igresa da Ventosa que por fóra non di moito máis é unha explosión de arte e cultura no interior, para non a perder e volver con calma a visitala.

Os homes verdes da Igrexa da Ventosa. Hai oito iguais.

Preto da Ventosa paramos nos Pendellos de Agolada, outras sorprendentes construcións para moitos de nós. Feitos en pedra do país, neles celebrouse durante anos a feira, que databa do medievo. A concelleira Inma Galego explicounos o devir dos pendellos e a utilización actual, nun deles fixemos o xantar comunitario.

Pola tarde, e despois do café de sobremesa en Agolada, estivemos no museo da minería de Fontao, mina de wolframio que no seu tempo chegou a ter ata 6000 persoas traballando (máis que o censo actual de todo o Concello de Vila de Cruces).

E como remate o Pazo de Liñares en Lalín, exemplo de boa restauración e mellor utilización dos espazos públicos.

Con qué ganas quedamos todos de repetir … e maior información da xornada, fotos incluídas, neste PDF para non esquecer os bós momentos.
ATA A PRÓXIMA … QUE NON TARDARÁ.

  • Divulga ti tamén!